Day: فبراير 28, 2012

الفنان التاغر ميني

كتيبة أسود الصحراء – مصراته تكشر أنيابها على الدكتور أبو بكر غلاب.

27 فبراير 2012

أبو بكر غلاب : أخصائي قلب وباطنة متخرج من ألمانيا و ليه مكانته في المجتمع و يعرفوه كل ناس آقار و م

شهور في طرابلس و نعتبروه فخر لأهل الجنوب كلهم لأنه دكتور ممتاز و محترم…..

في عصر الأمس وفي منطقة غرغور .. تم الإعتداء بالضرب… على الدكتور . وكذلك ابنه البالغ من العمر 14 سنة وآخر عمره 12 سنة .

رسالة من مواطنة ليبيه حرة الى كل الاحرار

========================

اللي صار ان الدكتور كان مروح من مزرعته و معاه ولده الصغير معتز اللي عمره 14 سنة و ولد تاني قريبهم عمره 12 سنة .. لما كان قريب من حوشه في منطقة غرغور في طرابلس طلع عليهم واحد بالسيارة و قعد يسطرب عليهم يعني ايشلش بالسياره و مشوا السيارتين في نفس الطريق .. السيارة كانت تابعة لكتيبة أسود الصحراء – مصراته اللي مقرها هو منزل هانيبال القذافي في غرغور .. و منزل الدكتور مقابل لمنزل هانيبال .. و للعلم الدكتور ما ليشي أي علاقة بالقذافي و نظامه و كان يدعم في الثورة بفلوسه و بحر ماله من غير ما حد يعرف .. و رزقه من عرق جبينه .. المهم بعدما نزل الدكتور من السيارة كلم الشاب اللي كان يسطرب في الطريق و قال له بالحرف : وقت الحرب حرب و وقت السلم سلم و توا لازم تحترم القانون و كلنا متساويين في الطريق و في الحقوق و اللي يمشي عليا يمشي عليك … فنزل هذا الشاب و قال للدكتور : كيف تقول كلمة زي هذه ؟؟ و هو متوقع ان الدكتور لأنه يسكن مقابل بيت هانيبال معناها كان من اتباع معمر .. و بعدها قالله أصلا توا أفتحلي بيتك بنخش عليه و بنشوفه .. قاله الدكتور البيت فيه مرتي و بناتي مش حنفتحه .. فنادى الشباب اللي معاه من الكتيبة و قال نبوا نقتحموا البيت .. قاللهم الدكتور على جثتي تقتحموه .. فقال للشباب اللي معاه قيموه و قاموه هو و ولده و الولد اللي معاهم .. و منطقة غرغور معروفه انها منطقة هااادئة و مش حيوية و شوارعها فاضيات .. فاستغلوا الوضع و دخلوهم لبيت هانيبال اللي هو مقر الكتيبة و بعدها حطوا كل واحد منهم في دار .. و كانوا يضربوا في الدكتور في دار و يستجوبوا في ولده اللي عمره 14 سنه في دار ثانيه .. كان الشخص هذا يسأل في الولد يقوله انت بوك شن يخدم قال له دكتور .. قال له كداب و ضرب الرصاص جنبه و فوق راسه .. بعدها قال له انت كم عمرك قال له 14 و هو ولد خالتي طول و عرض .. قال له كداب و قعد يضرب في الرصاص جنبه مره ثانيه .. و بمرة مرة كان يطلع يضرب في الدكتور ضرب مبرح و يرجع يسجوب الولد و يقوله لقينا عند بوك أوراق تثبت أنه في اللجان الثورية مع معمر و انتوا تسكنوا جنب حوش ولده .. اعترف أحسن .. و الولد يقول انا بوي ما ليشي علاقه بمعمر بكل .. و الشخص هذا كان يطلع مره مره و يضرب الدكتور و مرة قامله حديده بيضربه بيها على وجهه فتلقاها الدكتور بيده .. و انفتحت يده و نزف الدكتور .. طلع الشخص المجرم هذا و خش للولد و قال له شفت الدم هذا .. هذا دم بوك توا قتلناه .. الولد قريب جاته حالة نفسية .. و بعد ضرب مبرح فيه هو و الولد قريبه الثاني طلقوهم .. و قالوا للدكتور طلقنا الاولاد لكن انت مش حتطلع حي من بين ايدينا حي و زي ما قتلنا اتنين في الدار هذه آمس توا بنلحقوك ليهم .. بعدها الاولاد روحوا للبيت و سألوهم اخاوته و امه من اللي دار فيكم هكي .. ولد خالتي قعد يوتوت و الولد اللي معاه عمره 12 سنه كان يبكي و مش قادر يتكلم .. قاللهم ولد خالتي : كتيبة مصراته .. و طلعوا بنات خالتي للشارع و قعدوا يبكوا و يعيطوا و يطقوا على باب الكتيبة لين جوا الجيران و خشوا شباب الشارع و الجيران و فكوا الدكتور من بين ايديهم .. توا الدكتور يطالب بأن يحاسبوا اللي دار فيه هو و الاولاد الشي الفظيع هذا .. لأن مش ساهلة راجل بشيبته و هيبته يهينوه بالطريقه هذه .. و هو و جميع سكان منطقة غرغور يطالبوا بانسحاب الكتيبة من طرابلس ..

بقلم/// فدوي المغربي